I det magiske eventyret KVITEBJØRN møter me den uredde og eventyrlystne Liv, som lengtar vekk frå skogen der ho bur. I fjella møter Liv isbjørnen Kvitebjørn, og ho blir både nysgjerrig på og fascinert av denne vakre skapningen. I is-slottet til Kvitebjørn veks det fram eit varmt vennskap mellom dei to. For Kvitebjørn er ikkje berre ein bjørn – han er også prinsen Valemon, som er forheksa av ei trollkvinne. Men kan forbanninga bli brote slik at dei to kan finne lykka? Familiefilmen KVITEBJØRN er basert på manuset til Maja Lunde, inspirert av Asbjørnsen & Moe sitt klassiske eventyr om Kvitebjørn Kong Valemon. Lunde er ein av Noregs største internasjonale forfattarnamn, kjent for bøker som Bienes historie og Snøsøsteren. Filmen er fylt med fengjande songar spesialskrivne for filmen av den allsidige og folkekjære Odd Nordstoga, og blir regissert av Mikkel Brænne Sandemose, som tidlegare har stått bak Askeladden-filmane.